• Flexa

ឌិ​ត ប្រោ​ន មានជីវិត​កំសត់​វេទនា​យ៉ាង​នឹង ទើប​អាមេរិក​យក​ថត រឿង “​វាលពិឃាត “ ត្រូវគេ​បាញ់​ស្លាប់​ដោយសារ​អ្វី ?

10 ខែ កន្លងទៅ ណូ​រ៉ា

​រឿង​វាលពិឃាត គឺជា​រឿង​មួយ​និយាយ​អំពី​ជីវិត​នៅក្នុង​សង្គ្រាម និង​មិត្តភាព​ដ៏​ស្មោះស្ម័គ្រ​យូរអង្វែង រួមទាំង​ជីវិត​ស្ទើរ​រស់​ស្ទើរ​ស្លាប់​របស់​បុរស​ម្នាក់ ដែល​ស្ថិតនៅក្នុង​ទឹកដី​មាន​សង្គ្រាម​និង ជីវិត​របស់​អ្នកកាសែត​បរទេស​ម្នាក់​ដែល​ធុញថប់​ចំពោះ​ការដណ្តើម​អំណាច ។ រឿង​មួយ​នេះ​គឺ​ត្រូវ​បានដាក់​បញ្ចាំង​ជា​លើកដំបូង​នៅក្នុង​ឆ្នាំ ១៩៨៥ ដែលមាន​ចំណងជើង​ថា "​វាលពិឃាត​”​។ រឿងនេះ​ក៏បាន​និយាយ​អំពី​មិត្តភាព​របស់​អ្នកកាសែត​បរទេស និង​អ្នកកាសែត​ខ្មែរ​ហើយ​ស្ថិតនៅក្នុង​សង្គ្រាម​ក្នុងប្រទេស​កម្ពុជា ។​

​រឿងនេះ​ត្រូវបាន​ថត​ក្នុងប្រទេស​ថៃ​ដែល​បាន​ចំណាយ​ទឹកប្រាក់​ក្នុង​ការថត​អស់​ចំនួន ១៥​លាន​ដុល្លារ​អាមេរិក វា​គឺជា​រឿង​ពិត​ដែល​និយាយ​អំពី​ជីវិត​របស់លោក​ឌិ​ត ប្រោ​ន ហៅ​ហាំង ង៉ោ និង​ជីវិត​របស់​អ្នកកាសែត​ជនជាតិ​អាមេរិកាំង​ម្នាក់​គឺ​លោក ស៊ីតនី ស្ចា​ន​ប៊ើ​រ នៅក្នុង​ពេលដែល​ពួក​ខ្មែរក្រហម​វាយ​ដណ្តើម​ឈ្នះ​បាន​គ្រប់គ្រង​ភ្នំពេញ​នោះ ។ លោក ស៊ីតនី ស្ចា​ន​ប៊ើ​រ​គឺ​ត្រូវ​ជម្លៀស​ចេញពី​ប្រទេស​កម្ពុជា ចំណែក​លោក ប្រោ​ន នៅក្នុង​ពេលនោះ​គឺ​ត្រូវតែ​ប្រឈមមុខ​នឹង​ការធ្វើការ​ដ៏​ធ្ងន់ធ្ងរ​និង យ៉ាងយូរ​អង្វែង​ដោយ​ការពិត ភាព​ពិត​ភ័យ ដែល​ជីវិត​របស់​ប្រជាជន​ម្នាក់ៗ​ស្ថិ​ន​នៅក្រោម​ការ​គំ​រោម​កំហែង​យ៉ាង​ភ័យរន្ធត់ ។ ក្រោយមកទៀត ប្រោ​ន ត្រូវបាន​រត់គេច​ចេញ​មក​ដោយ​ការធ្វើដំណើរ​ឆ្ពោះទៅកាន់​ព្រំដែន​ថៃ ដើម្បី​ចេញទៅ​រស់នៅក្នុង​ជំរំ​ខ្មែរ​ក្នុង​ទឹកដី​ថៃ ។ ក្នុងខណ​:​ពេលនោះ លោក​ក៏បាន​ជួប​ជាមួយ​មិត្តសម្លាញ់​របស់លោក​គឺ ស៊ីតនី នៅក្នុង​ថ្ងៃទី​៩ ខែតុលា ឆ្នាំ​១៩៧៩ រួមទាំង​សាច់ញាតិ​ផ្សេងទៀត​ដែរ ។

​ជីវិត​របស់លោក ឌិ​ត ប្រោ​ន ហៅ ហាំង​ង៉ោ​

​លោក ឌិ​ត ប្រោ​ន និង​ឈ្មោះ​មួយ​ទៀតថា ហាំង ង៉ោ លោក​គឺជា​ជនជាតិខ្មែរ ។ លោក​បានកើត​នៅ​ថ្ងៃទី​២២ ខែមីនា ឆ្នាំ ១៩៤០ នៅក្នុង​ស្រុក​សំរោង​យោង​ខេត្តតាកែវ ប្រទេស​កម្ពុជា​លោក​គឺជា​គ្រូពេទ្យ​សម្ភព ហើយក៏​ជាម​ន្ត្រី​សុខាភិបាល​កងទ័ព​រប​ស់​កម្ពុជា​ដែរ ។ លោក​គឺជា​មនុស្ស​ដែលមាន​ចរិត​សុភាពរាបសា​ម្នាក់​តាំងពី​នៅ​កុមារភាព​មកម្ល៉េះ ហើយ​បាន​រៀន​នៅ​សាលា​ពេទ្យ​ជំនាញ​ផ្នែក​រោគ​ស្ត្រី​និង​ផ្នែក​សម្ភព ។ លោក​បាន​ខិតខំ​សិក្សា​រហូតដល់​ទទួលបាន​ជោគជ័យ ។ ប៉ុន្តែ​ខ្សែជីវិត​និង​ចំណេះដឹង​របស់លោក ដែល​បាន​សិក្សា​នោះ​គឺ​លោក​មិនបាន​ជាមាន​ពេល​ក្នុងការ​អនុវត្តន៍​វា​ប៉ុន្មាន​នោះទេ ។

​នៅក្នុង​អំឡុង​ពេលដែល​លោក​បាន​សិក្សា​ពេទ្យ​នោះ លោក​ក៏​ធ្លាប់​ចូលក្នុង​អន្លង់​ស្នេហ៍​របស់​នារី​ម្នាក់​ឈ្មោះ មី​ុ ហួយ ហើយ​ក៏បាន​រៀបការ​ជាមួយគ្នា​នៅក្នុងពេល​នោះដែរ ប្រពន្ធ​របស់គាត់​គឺ​កំពុងតែ​ហ្វឹកហាត់​រៀនសូត្រ​ដើម្បី​ឲ្យ​ក្លាយខ្លួនជា​គ្រូបង្រៀន​ម្នាក់ ។ នៅក្នុង​អំឡុង​ឆ្នាំ​១៩៧៥ ខ្មែរក្រហម​បាន​កាន់កាប់​ក្រុងភ្នំពេញ លោក ហាំង ង៉ោ ក៏បាន​ប្រឈមមុខ​ចំពោះ​ហេតុការណ៍​នោះ​ដូចជា​ប្រជាជន​នានា​នៅក្នុង​ប្រទេស​ដែរ ដែល​ត្រូវ​ពួក ប៉ុល ពត ជម្លៀស​ខ្លួន​ឲ្យ​ចេញពី​ក្រុង ។ ចាប់ពីពេលនោះ​មក​លោក​ក៏បាន​បែក​ពី​ក្រុមគ្រួសារ​របស់លោក​នៅពេល​ដែល​ធ្វើដំណើរ​ទៅ​ជនបទ​នោះ រូបលោក​ត្រូវ​ជម្លៀស​រហូតដល់​ស្រុកកំណើត​របស់លោក​វិញ ។​

​នៅក្នុង​ពេលនោះ​អ្នក​ដែលមាន​ចំណេះដឹង មិន​ថា​ផ្នែក​អ្វី​នោះទេ ឫ​ក៏បាន​មាន​ខ្សែស្រឡាយ​ធ្វើ​ធំ​នោះ​គឺ​ត្រូវ​ពួក​ខ្មែរក្រហម​សម្លាប់​ទាំង​ពួជ បើ​ពួកវា​ដឹងថា​ជា​អ្នកមានចំណេះដឹង​នោះ​។​

​ហេតុដូច្នេះ​ហើយ​ទើប​គាត់​បាន​ស្លៀកពាក់​តែ​សម្លៀកបំពាក់​ដូចជា​អ្នកបើក​តាក់ស៊ី​ម្នាក់​ដើម្បី​កុំ​ឲ្យ​ពួកវា​ដឹង​ពី​ប្រវត្តិ​របស់លោក ។ ក្នុងការ​រស់នៅ​ជាមួយ​ខ្មែរក្រហម លោក​គឺជា​អ្នកទោស​ម្នាក់​របស់​ពួកវា​នៅក្នុង​អំឡុង​សង្គ្រាម​ដែល​ត្រូវ​ពួកវា​ចាប់​ដាក់គុក​និង​ធ្វើ​ទារុណកម្ម​ហើយ​ថែមទាំង​គេ​បញ្ជា​ឲ្យ​កាត់ទោស​ប្រហារជីវិត​ផងដែរ ព្រោះតែ​គេ​សង្ស័យថា​លោក​គឺជា​អ្នកចេះដឹង​ម្នាក់ ហើយ​ដើម្បីរ​ស់លោ​កបាន​លាក់​ប្រវត្តិរូប និង​បាន​បដិសេធថា គឺ​លោក​មិនមែនជា​វេជ្ជបណ្ឌិត ឫ​ជា​អ្នកសិក្សា​អ្វី​នោះដែរ លោក​ជា​ប្រជាជន​ធម្មតា​ប៉ុណ្ណោះ ។​

​ចាប់តាំងពី​ចេញពី​ក្រុង​មក ជា​ញឹកញាប់​ណាស់ ហាំង ង៉ោ ត្រូវបាន​គេ​ចាប់​ដាក់​គុត​និង វាយដំ​យ៉ាងធ្ងន់ធ្ងរ ។ មាន​ម្តងនោះ​គាត់​ត្រូវបាន​គេ​ចាប់​ដោយ​ចោទថា​បាន​លួច​អាហារ​ដើម្បី​យកទៅ​ឲ្យ​គ្រួសារ គាត់​ក៏ត្រូវ​បានគេច​ង​ឆ្កាង​ដោយ​យក​ភ្លើង​មក​ធ្វើ​ទារុណកម្ម​លើ​គាត់ ហើយ​កូនដៃ​របស់គាត់​ត្រូវបាន​គេ​កាត់ចោល​ទៀតផង ។ អ្វីដែល​ជាការ​អកុសល​បំផុត​នោះ​គឺ​ការសិក្សា​ជា​វេជ្ជបណ្ឌិត​ពិនិត្យ​រោគ​ស្ត្រី​របស់គាត់​នោះ ត្រូវបាន​លាក់ទុក​មិន​ឲ្យ​គេ​ដឹង ដោយ​គ្មាន​ឳ​កាស​អាច​ព្យាបាល​នរណាម្នាក់​បានឡើយ ហើយ​នៅ​ទីបំផុត​នោះ​ប្រពន្ធ​របស់លោក​ត្រូវស្លាប់​ទាំង​កូន​នោះ​ក្នុង​ពោះ​យ៉ាង​អ​ណា​ច​អ​ធ័​ម​និង​គួរ​ឲ្យ​ស្តាយ ដោយសារតែ​នាងរង​របួស​ធ្ងន់ធ្ងរ​ពិការ​វាយដំ​របស់​ពួក​ខ្មែរក្រហម​ក្នុងការ​សួរចម្លើយ​នាង ។ អស់​រយ​:​ពេល​បួន​ឆ្នាំ លោក​បាន​បាត់បង់​នូវ​អ្វីៗ​ទាំងអស់ គឺ​ប្រពន្ធ កូន ឪពុក រួមទាំង​សាច់ញាតិ​ជាច្រើន​នៅក្នុង​គ្រួសារ​ត្រូវបាន​ស្លាប់​នៅក្រោម​កណ្តាប់ដៃ​របស់​ពួក​ខ្មែរក្រហម​ក្រោយមក​ពួក​វៀតណាម​ក៏​ចូលរួម​មក​វាយ​ផ្តួលរំលំ​ពួក​ខ្មែរក្រហម លោក​ក៏បាន​រត់គេចខ្លួន​ជាមួយ​ក្មួយ​ស្រី​កំព្រាម្តាយ​របស់​នាង​ត្រូវបាន​ពួក​ខ្មែរក្រហម​សម្លាប់ចោល ។

ក្មួយ​ស្រី​ម្នាក់​នោះ​ឈ្មោះថា ញឹម ឫ សុភា ។ លោក​បាន​រត់គេចខ្លួន​ទៅ​នៅ​ជំរំ​តាម​ព្រំដែន​ថៃ ហើយ​បានធ្វើ​អន្តោប្រវេសន៍​ទៅកាន់​សហរដ្ឋអាមេរិក​នៅក្នុង​ឆ្នាំ ១៩៨០ ក្នុងនាម​ជា​ជនភៀសខ្លួន ។ ពេលដែល​លោក​បាន​រស់នៅក្នុង​ជំរំ​នោះ លោក ហាំង ង៉ោ ក៏បាន​ជួប​ជាមួយនឹង​ប្អូនថ្លៃ​ស្រី​ពីរ​នាក់​របស់គាត់ ដែល​ពួកគេ​ទាំងនោះ​បាន​រត់​មក​នៅក្នុង​ជំរំ​តាម​ព្រំដែន​នោះ​ក្នុង​ខែកក្កដា ឆ្នាំ ១៩៧៩ នៅ​ទៅនោះ​លោក​បាន​ធ្វើជា​គ្រូពេទ្យ​ម្នាក់​ដើម្បី​ជួយ​មើលជំងឺ​ឲ្យ​ជនភៀសខ្លួន ។ ក្រោយមក​លោក​ក៏​ត្រូវបាន​គេ​ជ្រើសរើស​ឲ្យ​ធ្វើ​តួកុន​ដែល​លោក​មិន​ធ្លាប់​បានធ្វើ​ពីមុន​ឡើយ ។ លោក​ថត​ខ្សែភាពយន្ត​មួយ​គឺ​រឿង វាលពិឃាត ដែល​រឿង​មួយ​នោះ​ពោរពេញ​ទៅដោយ​ភាព​ទុក្ខសោក ហើយក៏​ជាម​ហា​វិនាសកម្ម​ដ៏​សែន​ជូរចត់​ដែល​គាត់​ធ្លាប់​ទទួល​កន្លងមក ។ ហើយ​ក្រោយមកទៀត​លោក​ក៏បាន​ចូលធ្វើការ​បន្តទៀត​ជាមួយនឹង​អង្គការ​សិទ្ធមនុស្ស​ដើម្បី​អភិវឌ្ឍន៍​កម្ពុជា ។

​លោក​គឺ​ត្រូវបាន​គេ​ស្គាល់ឈ្មោះ និង​ចាប់ផ្តើម​ល្បីល្បាញ​ថា​ជា លោក​ឌិ​ត ប្រោ​ន នៅក្នុង​ខ្សែភាពយន្ត​រឿង វាលពិឃាត ។ នៅក្នុង​ការសម្តែង​រឿងនេះ ធ្វើ​ឲ្យ​លោក​ទទួលបាន​ពានរង្វាន់​អូ​ស្កា និង​ពានរង្វាន់​ផ្សេងៗ​៤​ទៀតផង​ដែរ នៅក្នុង​ឆ្នាំ ១៩៨៥ ។​

​ការរត់​មក​នៅ​សហរដ្ឋអាមេរិក​គិតថា លោក​ត្រូវបាន​រស់រានមានជីវិត មាន​សេចក្តីសុខ ហើយ​រួច​ផុតពី​ការកាប់សម្លាប់​ហើយ តែ​មិន​ដូច្នេះ​ឡើយ គឹ​នៅក្នុង​ថ្ងៃទី ២៥ ខែកុម្ភ​: ឆ្នាំ ១៩៩៦ ក្រោយពី​មានជីវិត​រួចផុត​ពីរ​បប ប៉ុល ពត មិនបាន​ប៉ុន្មាន​ផង លោក​ក៏​ត្រូវបាន​គេ​លួច​បាញ់​នៅក្នុង​ខណ​:​ពេលដែល​លោក​កំពុងតែ​ឈរ​នៅក្បែ​ឡាន BMW នៅក្នុង​រោង​ដាក់​ឡាន​ក្នុងផ្ទះ​របស់លោក​នៅ ឯ​ឡូ​អែន​ចឺ​ឡេស រដ្ឋ​កាលីហ្វ័រ​នីញ៉ា សហរដ្ឋអាមេរិក ដោយ​នៅលើ​សាកសព​គេ​ឃើញ​លោក ឌិ​ត ប្រោ​ន បាន​កាន់​រូបថត​ប្រពន្ធ​របស់គាត់​គឺ​នាង មឺ​ុ ហួយ នៅ​នឹង​ដៃ ។​

​ការស្លាប់​នៅពេល​ដំបូង​គេ​គិតថា គាត់​គឺ​ត្រូវបាន​គេ​សម្លាប់​ដោយ​ការ​លួច​ប្លន់​ដើម្បី​យកលុយ​ទិញ​គ្រឿងញៀន តែ​ក្រោយមក​ក្មួយ​ស្រី​របស់គាត់​គឺ សុភា និង​សាច់ញាតិ​បងប្អូន​បានគិត​ថា ការស្លាប់​របស់គាត់​គឺមាន​ការពាក់ព័ន្ធ​នឹង​របប​ខ្មែរក្រហម តែ​ក្រុម​ស៊ើ់បអង្កេត​បាន​រកឃើញថា ការស្លាប់​របស់គាត់​គឺ​ពិតជា​ស្លាប់​ដោយ​ការ​ប្លន់​យក​ទ្រព្យ​មែន ។ នៅក្នុង​ថ្ងៃទី​១៤ ខែមេសា ឆ្នាំ ២០០៤ កន្លងទៅនេះ តុលាការ​បាន​កាត់ទោស​ជនឧក្រិដ្ឋ​ដែល​បាន​បាញ់សម្លាប់​លោក​រួចរាល់​ហើយ ដោយ​ជនឧក្រិដ្ឋ​នោះបាន​សារភាព វា​សម្លាប់​លោក​ដើម្បី​ប្លន់​យក​ទ្រព្យ​របស់គាត់​តែប៉ុណ្ណោះ ។

​ថ្វីបើ​ជីវិត​ឃ្លាតឆ្ងាយ​គ្មាន​ថ្ងៃ​នឹង​ត្រឡប់មកវិញ​ក៏ដោយ ប៉ុន្តែ​នៅក្នុង​ថ្ងៃទី ២៥ ខែកុម្ភ​: កន្លងមកនេះ​ក្រុម​អ្នក​ផលិត​ខ្សែភាពយន្ត​ដែលមាន​មនុស្ស​ម្នាក់​ជាច្រើន​បាន​ចូលរួម​ក្នុង​កម្មវិធី​ផ្តល់រ​ង្វាន់​ដល់​ក្រុមហ៊ុន​ហូលីវូដ​នោះ នៅ​ខណ​:​នោះគេ​ក៏​មិនបាន​បំភ្លេច​ពី​តារា​យន្ត​ល្បីល្បាញ​របស់​ខ្មែរ​យើង​ម្នាក់នេះ​ផងដែរ គឺ​លោក ហាំង ង៉ោ ដែល​គេ​គ្រប់គ្នា​បាន​ស្គាល់ឈ្មោះ​លោក​ថា ឌិ​ត ប្រោ​ន ជា​តួឯក​នៅក្នុង​ខ្សែភាពយន្ត​រឿង វាលពិឃាត​នោះ ។ ទោះបីជា​គាត់​ស្លាប់​មែនពិត​តែ​រឿងនេះ​ត្រូវបាន​គេ​យល់ថា នៅតែ​ល្អ ហើយក៏​ជា​រឿង​មួយ​ដែល​បង្ហាញ​ឲ្យ​ពិភពលោក​ទាំងមូល​ដឹង​រឿងរ៉ាវ​ដ៏​ជូរចត់​របស់​ប្រជាជន​កម្ពុជា​នៅក្នុង​របប​វាលពិឃាត​នោះ ។​

​នៅក្នុង​របប ប៉ុល ពត កូនដៃ​ខាងស្តាំ​របស់លោក​ត្រូវបាន​គេ​កាត់ចោល​ពាក់កណ្តាល ។ លោក​គឺជា​មនុស្ស​ដំបូង​គេ​ទទួលបាន​ពានរង្វាន់​អូ​ស្ការ​ទី ៥ នៅក្នុង​ឆ្នាំ ១៩៨៥ ដែលជា​ភាពយន្ត​មាន​ភាពជាក់ស្តែង​ល្អ​បំផុត​និង​បាន​ពានរង្វាន់​ចំនួន ៤​ទៀត ជា​តារាភាពយន្ត​សម្តែង​ល្អ​បំផុត ៕ ហាម​យក​ព័ត៌មាន​ទៅ​ចុះផ្សាយ​បន្ត​ដោយ​គ្មាន​ការអនុញ្ញាត​បើ​មិន​ដូច្នោះ​យើង​នឹង​ចាត់វិធានការ​ទៅតាម​ផ្លូវច្បាប់​..!!

  • ដោយ៖ ណូ​រ៉ា

ហាមយកអត្ថបទពី វេបសាយ http://www.dnt-news.com ដោយ​គ្មានការអនុញ្ញាតិ

សុខភាព/បុរស/ស្ត្រី